Клиенттер тауарды сатып алуы үшін оны қалай таныстыру керек

Қазіргі нарықтағы бәсекелестің белең алған тұсында клиенттің назарын аудару, оған дәл сіздің тауарға немесе қызметке таңдау тоқтата алу оңай шаруа емес. Сондықтан да маркетинг және басқа сауданы  ілгерілету құралдары қазіргі кезде аса үлкен сұранысқа ие. 

Өзіңізді әлеуетті тұтынушыларға таныстыра білуіңіз, жарнама жасауыңыз аса маңызды. Тауарды сатып алу үшін оны қалай сипаттауға болады? Тауардың  сипаттамасын қалай жазуға болады? OLX командасы жарнама жасау үшін сіздің тауарыңызға немесе қызметіңізге сипаттама мәтінін сауатты және тиімді құрастыруға көмектеседі. Барлық мәліметтер осы мақалада 🙂

Сатылатын затты қалай сипаттау керек? Кәсіпкерлер арасында жиі кездесетін, барынша қайталамауға тиіс қателіктерді талдап көрейік: 

• тым қысқа сипаттама немесе керісінше пайдалы ақпарат қамтылмаған тым ұзын мәтін;
• грамматикалық, пунктуациялық және басқа да қателіктердің болуы; 
• өнімнің негізгі сипаттамаларының болмауы: материалы, сапасы, өлшемі, салмағы және т.б.; 
• тауардың фотосуретінің болмауы;
• мәтін жүйесіз жазылған, логикалық реттілік жоқ, абзацтар қолданылмаған болса бұл мәтіннің көрнекілігін азайтып, оны оқуға деген ұмтылысты жоғалтады.

Егер сіз өнімнің техникалық сипаттамасын дұрыс ұсынғыңыз келсе және жалпы сатылатын киімді немесе кез келген басқа өнімді қалай сипаттау керектігін білгіңіз келсе, келесі алгоритмді басшылыққа алыңыз:

Ақпараттық тақырып жасаңыз 

Жарнаманың негізгі элементтері – тақырып және бірінші сөйлем, өйткені бірінші кезекте пайдаланушылардың назары соларға аударылады. Клиенттердің назарын аударатын негізгі ақпаратты осы бөліктерге енгізуді мақсат етіңіз. Сипаттамада грамматикалық қателер мен қысқарған сөздердің болуынан аулақ болыңыз. «Ең арзан тауарлар!» немесе «Елдегі ең жақсы қызметтер» сияқты жаттанды сөздерді қолданбаңыз. Мұндай тұжырымдар тиімсіз және сенім тудырмайды.

Осы шағын жарнаманың бөлігіне өніміңіз немесе қызметіңіз туралы барлық егжей-тегжейлі ақпаратты енгізуге тырыспаңыз, ақпарат қысқа әрі нұсқа болсын. 

Мәтініңіз құрылымды болсын 

Сіздің жарнамаңыз оқылатындай және көрнекі болуы керек. Тауардың әдемі сипаттамасы оның құрылымы мен дәйектілігінен басталады: мәтінді абзацтарға бөліңіз. Мәтінді тығыз жазу арқылы шектеулі өріске ұзын мәтінді сыйғызуға тырыспаңыз, сөздер арасында бос орындар болуға тиіс. Ұзын сонар мәтінді қабылдау өте қиын және одан әрі оқуға қызығушылық қалмайды. Құрылымдалған мәтін болмаса, клиент сіздің жарнамаңыз елеусіз қалдырып, келесі тауар сипатына ауыса береді.

Негізгі сөздерді қолдана біліңіз

Сіздің жарнамаңыз мүмкіндігінше нақты болуы керек, «ең жақсы», «ең ыңғайлы», «өте арзан» және т.б. сияқты жалпы тіркестерді қолданудан аулақ болыңыз. 

Пайдаланушылар сіздің ұсынысыңызды таба алатын мүмкіндігінше көп кілт сөздерді қолданыңыз. Ашық дереккөздер арқылы қолжетімді іздеу сұраулар бойынша статистикалық деректерді қарай отырып тауар санаты бойынша қандай сөздер негізгі кілт сөздер болып табылатынын білуге болады. 

Мысалы, егер сіз тырнақ жасау қызметтерін ұсынсаңыз «маникюр», «педикюр», «өсіру», «гель жабыны» және т.б. секілді негізгі кілт сөздерді пайдалануыңыз қажет.

Жарнамаға тауар фотосын тіркеңіз 

Қазіргі сатып алушы не сатып алатынын және ақшасын жұмсағалы отырған тауардың түр-түсін көргісі келеді. Сіздің жарнамаңызға жақсы сападағы әртүрлі қырынан түсірілген тауар фотосын тіркеу өте маңызды. Бұл сіздің дүкеніңізге деген сенім ұялатып, клиенттің қызығушылығын арттырады. Фотосурет неғұрлым сапалы және жанды болса, пайдаланушының сіздің ұсынысыңызға қызығушылық таныту ықтималдығы соғұрлым жоғары болады.

Сипаттамасында тауар сипаты мен қызметі туралы жаза кетіңіз 

Тауар немесе қызмет туралы барлық қажетті ақпаратты беріңіз. Тауардың маркетингтік сипаттамасы мүмкіндігінше пайдалы және тиімді болуы үшін сіз өзіңіздің әлеуетті клиентіңіздің кім екенін және сіздің нысаналы аудиторияңыздың қандай екенін нақты білуіңіз керек. Мәтінді дәл осы контингентке бейімдеңіз: стилистика, мәтін форматы, әрекетке шақыру және т. б. Сіздің сипаттамаңыз сіздің әлеуетті клиентіңіз үшін түсінікті және қызықты болуы керек.

Тауардың/қызметтің қасиеттерін сипаттаңыз: қысқаша сипаттама, негізгі сипаты, техникалық ерекшеліктер, негізгі артықшылықтар және т.б. Мысалы, сіз сатуға арналған киімнің сипаттамасын дайындайсыз, айталық, қысқы куртка. Егер сіз сипаттамада өлшемі мен түсі туралы ақпаратпен қоса «жылы қысқы куртка» деп жазсаңыз, әлеуетті клиент сіздің өніміңіздің артықшылықтары қандай екенін, сіздің ұсынысыңыз басқа жарнамалардан қалай ерекшеленетінін түсінбей қалуы мүмкін. Сіздің жарнамаңызбен танысқаннан кейін, клиент сіз сатып отырған тауар туралы нақты хабары болуы керек. Сондықтан сипаттамада сіз негізгі қасиеттерді сипаттап қана қоймай, тұтынушыға қажетті маңызды артықшылық және тиімділік астын сыза көрсетуіңіз керек. Мысалы, «Мен бастапқы қалпында сақталған қысқы куртканы сатамын, түсі – қара, өлшемі – S, астары – қаз мамығы. -25 градусқа дейінгі температураға төтеп бере алады. Астана қысы немесе басқа суық аймақтарға сапар үшін өте қолайлы».

Қысқа-нұсқа жазуға тырысыңыз, сіз бірден есте қаласыз

Қысқа жаза білу де өнер. Ақпарат шұбалыңқы болмасын, барынша шақтаңыз, әрбір сөз сатып алушы үшін ауқымды ақпарат бере алатындай болсын. Үйреншікті, жалпылама сөздерді қолданудан аулақ болыңыз. 

Әрекетке шақыру

Сіздің жарнамаңыз міндетті түрде әрекетке шақырып отыратындай болуы керек. Клиент тауарды не үшін сатып алып жатқанын, ол заттың қандай пайдасы, қандай артықшылықтары бар және т.б. білуге тиіс. Әлеуетті клиентті тарту үшін сіз оны іс-әрекет жасауға ынталандырып, оның сізбен байланысуына жағдай туғызуыңыз керек, мысалы, қандай да бір тиімді ұсыныс жасап көріңіз.

Мәтінді жарияламас бұрын тексеріп алыңыз

Ізгі, жылы шырайлы стильді қолданыңыз, оны нысаналы аудиторияңызға барынша бейімдеңіз, клиенттеріңізге не сатқыңыз келетінін және ең бастысы ол не үшін екенін түсіндіре біліңіз. Мәтіндегі қателіктерден аулақ болыңыз, қысқарған сөздер қолданбаңыз, қысқа-нұсқа жазыңыз. Мәтінді стилистика мен грамматикаға тексеруді ұмытпаңыз.

Толық қамту, айқындық және қысқа қайыру – бұл жарнама жасау кезінде ұстануға болатын негізгі сипаттамалар. Кез келген мәміленің сәтті өтуі тек бағаға, жақсы ұсынысқа, жақсы шарттарға ғана емес, сонымен қатар сіздің позицияңызға және әлеуетті клиенттеріңізге ақпаратты қалай жеткізетініңізге де байланысты.

Көріп отырғандарыңыздай, тұтынушылардың сіздің тауарыңызға/қызметіңізге деген қызығушылығында тек сапа, қолайлы шарттар немесе тартымды ұсыныс қана емес, сонымен қатар сіздің тауарыңыз туралы ақпаратты қалай ұсынатыныңыз да үлкен рөл атқарады. Ең бастысы, адал болыңыз, тауар туралы толық мәлімет беріңіз, шынайы болыңыз, креативтілік танытыңыз, грамматикалық қателіктер мен артық ақпаратқа жол бермеңіз.