Бизнес-идея: мерекелерді ұйымдастыру

Мерекелік іс-шаралар – туған-туыс, жақындарыңның басын қосу, қуанышыңды бөлісудің керемет мүмкіндігі. Мереке елдің есінде ұзақ қалып, барынша көңілді өтуі үшін халық қазір event агенттіктерінің қызметіне жүгінуде. Бұл мақалада біз осы бизнес мүмкіндігін талдайтын боламыз, нені ескеру керек, ол расында қазір сұранысқа ие ме және т.б. мәселелер 🙂

Event бизнес (Бизнес ивент) – бұл мерекелерді ұйымдастыру қызметі, олар балалар ертеңгіліктері, отбасылық мерекелер және іс-шаралардан бастап бизнес-конференцияларға, корпоративтік кештерге және т. б. дейін әртүрлі типте және сипатта болуы мүмкін. Өз кезегінде ивент агенттік – сіздің мерекелік іс-шараңыздың жоғары деңгейде өтуіне қатысты мәселелермен айналысатын ұйым. Той-жиынды ұйымдастыру бойынша басыңыз қатпайды, онымен осы компания мамандары айналысатын болады. Бұл бизнесте қазір үйлену тойлары, туған күн, мерейтойлар және басқа да дәстүрлі той түрлері халық арасында аса танымал. 

Ивент агенттікті қалай ашуға болады? Алдымен бәсекелестеріңіздің жұмысына мән беріп, талдау жасаңыз. Бұл нарықтағы ағымдағы жағдаймен жақын танысуға, олардың ерекшеліктерін түсінуге, ұйымдастырушылардың артық және кем тұстарын тануға көмектеседі. Сіз тұратын қаладағы немесе елді мекендегі осы сала бойынша компаниялар тізімін құрастырыңыз. Олардың көрсететін қызмет түрлеріне, баса назар аударып отырған саясатына, өздерін қалай жарнамалайтындығына және қандай арналар арқылы клиенттерге ақпарат жеткізіп жатқандығына назар аударыңыздар. Мерекелік іс-шаралар ұйымдастыру бойынша бизнестің  басты ерекшелігі тек оның бағасы, халық арасында танымал болуында ғана емес, ол сіздің өзгеге ұқсамайтын бірегей болуыңыз және сіз ұсынып отырған өнімнің шығармашылық құрамының өзгеше болуы. Сондықтан да, сіз алдымен ивент командаңызға тән «даралық» не екенін анықтап алыңыз. 

Жоғарыда айтқандай, event қызметтер әртүрлі сипатта болуы мүмкін, олардың барлығы клиенттердің қажеттіліктері және іс-шараны ұйымдастыру себебіне байланысты. Нарықтағы бәсекелестеріңізге жасалған талдау, сонымен қатар осы бизнес сегментіндегі актуалды сұраныстар мен тенденциялар негізінде өзіңізге сай келетін түрін таңдап алыңыз. Ол мерекелерді, балалар таңертеңгілігін ұйымдастыру бизнесі немесе тек қана той-жиындарын ұйымдастыру болуы мүмкін. Сіз бір бағытты ғана таңдауыңызға болады немесе түрлі іс-шараларды ұйымдастыруды қамтитын кең ауқымды түрін қолға алсаңыз да өз еркіңіз. 

Компанияны тіркеу 

Алдымен кәсіпкерлік қызметтің заңдық құрамын, яғни сіз ЖШС немесе ЖК ретінде тіркелетініңізді анықтап алуыңыз қажет. Өйткені event қызметтер саласында бизнес жүргізу үшін сізге қызметкерлерді жалдау қажет, тиісінше сізге бизнесті алдымен тіркейсіз. Әдетте, осы саладағы кәсіпкерлер кәсіпорындарын қарапайым жүйе бойынша ашады. 

Офистік қызметжай және жұмыс нысанын анықтап алыңыз

Қазіргі заманда, әсіресе карантиндік шаралар кезінде офистің болуы кәсіпкерлік қызметті жүргізудегі міндетті шара емес. Сіз клиенттермен кездесулерді кез келген жерде, мысалы коворкинг-аймақтарда, кафеде және т.б. жерлерде ұйымдастыра аласыз. Керекті инвентарь мен жабдықтарды егер бос орын болса жеке үйіңізде сақтауға болады. Қызметкерлеріңізге үнемі офисте болу қажет емес, қалада ыңғайлы жерлерге бару немесе бейне байланыс арқылы да сөйлесуге, қандай да бір жұмысқа қатысты мәселелерді шешуге болады.  Әрине, өздерінің офисі, қызмет орындары бар агенттіктерге келгенде, клиенттер өздерін сенімді сезінуі мүмкін, бұл атрибуттар агенттікке ерекше мәртебе беретіні анық. 

Қызметкерлерді іздеу

Қызметкерлер санының артуы сіздің осы саладағы бизнес бағытыңызға, өзіңізді кең ауқымдағы  event  агенттік ретінде болмаса бір ғана бағытта жұмыс істейтін агенттік ретінде таныстыруыңызға тікелей байланысты. Бұл өз кезегінде жұмыс көлемі мен  ауқымына қатысты болады. Іс-шараларды ұйымдастыру бойынша қызмет көрсететін кез келген компанияда міндетті түрде сыртпен байланыс құратын немесе сату бойынша клиенттермен жұмыс істейтін менеджерлер, бухгалтер, декораторлар, дизайнерлер, сценарист, жүргізушілер, музыканттар, әртістер және т. б. жұмыс істейді. Қажет болған жағдайда, мысалы, сіздің клиентіңіз белгілі бір әншіні шақыру, залды безендірудің ерекше түрі, техникалық жабдықтар және т. б. бойынша бөлек тапсырыс жасаған кезде қосымша мердігерлер тартылады. 

Жаңа клиенттерді тартудың, сондай-ақ компанияңыз туралы ақпарат таратудың ең тиімді және ұтымды әдісі сол баяғы «жұрттан есту» болып табылады. Клиенттердің шын көңілінен айтқан пікірлерінен асқан жақсы, сенімді және тиімді жарнама жоқ. Қазіргі уақытта әрбір ұйым әлеуметтік желілер, өзінің корпоративті парақшасы арқылы ақпарат жариялап отыруы да маңызды. Нысаналы аудиторияға бағытталған таргет-жарнамаларды іске қосыңыз, танымал платформалар мен порталдарда қызметтеріңіз туралы хабарландыруларды жариялаңыз.

Event қызметтері саласында бизнесті құру кезіндегі маңызды кезең қажетті жабдықтар мен инвентарьлар сатып алу. Мұнда тағы да бәрі компанияңыздың жұмысының ерекшелігі мен сіз таңдаған қызмет бағытына байланысты. Іс жүзінде балалар мерекелері осы сегменттегі ең қымбат іс-шаралардың бірі болып саналады, өйткені әртүрлі ойыншықтар, балалар аксессуарлары, анимациялық костюмдер, балалар бояулары және басқа да өнімдер қажет. Егер сіз балалар мерекелеріне қызмет көрсетпесеңіз, сізге техникалық жабдықтар, динамиктер, микрофондар, сценарийге қатысты атрибуттар және т.б. негізгі қажетті заттарды сатып алу жеткілікті болады. Есіңізде болсын, жалға алу – бұл сіздің қаражатыңызды және тауарлық-материалдық құндылықтарды сақтауға арналған орынды үнемдеудің тамаша нұсқасы.