Жүк тасымалдау саласындағы бизнес 

Қазіргі уақытта мобильді болу заман ағымына сай болу дегенді білдіреді, адамдар мекендеу орындарын жиі ауыстырады, еш қиындықсыз жаңа қалаларға немесе тіпті басқа елдерге көшіп кете береді, өзгерістерге жеңіл қарайды. Жалпы жаһандану үдерісі кең етек алып, қарыштап дами түсуде, елдер арасында сауда, экономика және т.б. мәселелер бойынша әрекеттесу мен интеграция жаңа деңгейге көтерілді. Осыған орай жүк тасымалдау бизнесіне деген сұраныс та жоғарылады. 

Жүк тасымалдауға бизнес тұрғысынан қарайтын болсақ, бұл адамдардың кез келген көлемдегі нысанды бір орыннан екінші орынға тасымалдауына мүмкіндік беретін процесс. Жүк тасымалдаудың бірнеше түрі бар, олар нысаналы мақсатына қарай бірнеше түрге жіктеледі. Бизнесті барынша тиімді етіп құрастыру үшін оның әрбір кезеңін мұқият ойластыру керек. 

1. Алдымен осы сала бойынша жергілікті жер нарығына талдау жасаңыз: қандай компаниялар бірыңғай логистикалық қызмет ұсынатындығын, қызмет көрсету түрлері қаншалықты кең қамтылғандығын, компанияда қандай көлік құралдары бар екендігіне, ұйымдастыру артықшылығы мен кемшіліктері неде және т.б. Басқаша айтқанда жүк тасымалдау бизнесін неден бастау керек екендігін білмесеңіз, алдымен бәсекелестердің жұмысына талдау жасап көріңіз. Ол сізге осы бизнес саласындағы нарықтың хал-ахуалдың толық сипатын көз алдыңызға әкеледі, сіз бірден артық, кем тұстарына назар аударып, жүк тасымалдау бизнесін қалай ұйымдастыру туралы белгілі бір пікірге келесіз.  
2. Компанияңыздың қызмет көрсету бағытын айқындап аласыз. Жүк тасымалдау қалай жұмыс істейтіндігіне, нарықта көрсетілетін қызметтер туралы терең талдау жасағаннан кейін, сондай-ақ өзіңіздің қаржылық мүмкіншілігіңізді ескере отырып жеке бизнес-моделіңізді қалыптастырыңыз. Осы нарықтағы өз орныңыз, көрсететін қызмет түрлері, қай саланы қолға алатыныңыз және т.б. анықтап алыңыз. Логистикалық қызмет көрсету нұсқалары бірнеше: пәтер және офистерді көшіру, коммерциялық жүктер, қалааралық және халықаралық тасымалдау. Бағытты таңдаған кезде сіз техникалық мүмкіншіліктеріңізді, сонымен қатар жүк сақтау қоймаларының болу қажеттілігін ескергеніңіз жөн.

Бизнесті тіркеу

Қазақстанда жүк тасымалдау үшін ЖК ашу қажет пе? Осы мәселе бойынша жиі қойылатын сұрақтардың бірі. Логистикалық қызметтерге деген сұраныс пен ұсыныстың көп болуы, сонымен қатар алаяқтық оқиғаларының жиі кездесіп жатуы нарықта осы салада бәсекелестікке сай болып, клиенттерге сапа кепілдігін ұсынудың аса маңызды екендігінің тағы бір көрінісі. Сондықтан да барлық процес құжат жүзінде ресімделуге тиіс: автокөлік жүкқұжаты, жүк тасымалдауды ұйымдастыру туралы шарт жасау, сақтандыру және т. б. Сәйкесінше бұл құжаттарды алу үшін бизнесіңіз тіркелген болуы керек. Қазақстан Республикасының заңнамасына сәйкес 2023 жылғы жағдай бойынша жылдық табысыңыз 4 053 750 теңгеден асқан жағдайда сіз ЖК немесе ЖШС ретінде тіркелуге міндеттісіз.

Банктік шот ашу

Бизнесті тіркегеннен кейін сізге банктен шот ашу қажеттілігі туындайды, ол арқылы сіздің компанияңыздың барлық қаржы операциялары жүргізілетін болады. Бұл жағдайда өз клиенттеріне тиімді және бейілді ұсыныстар ұсынатын сенімді банк таңдаған дұрыс. 

Қажетті лицензияларды алу (қажет болған жағдайда) 

Жүк тасымалдаумен айналысу үшін не қажет? Алдымен бизнесіңізді жүргізу үшін қандайда бір лицензия керек пе, жоқ па түсініп алу керек. ҚР заңнамасына сәйкес, қауіпті жүктерді тасымалдауды қоспағанда, біздің еліміздің аумағында логистикалық бизнесті жүзеге асыру үшін, оның ішінде Халықаралық тасымалдар бойынша да лицензиялар қажет емес.

Егер сіз аса қауіпті жүктерді тасымалдау бойынша қызметтер көрсетуді жоспарласаңыз, қажетті органдардан барлық рұқсат құжаттарын алуыңыз қажет. Қауіпті жүк түрлеріне тасымалдау кезінде қоршаған ортаға немесе адамға зиян келтіру қаупі бар тауарлар жатады. Төтенше жағдайлардың туындауын болдырмау үшін арнайы қауіпсіздік шаралары қабылданады: көлік қозғалысының жылдамдығы, сақтау шарттары және т. б.

Көлік құралы және басқа да қажетті шығын материалдарын сатып алу

Мысалы, микроавтобустармен жүк тасымалдау бизнесі үшін бірнеше микроавтобус сатып алу қажет, олардың жабдықталуы тапсырыс көлеміне, сондай-ақ техникалық сипаттамаға байланысты. Көліктерді өзіңіз таңдаған логистикалық қызмет бағытына байланысты сатып аласыз. Бастапқы кезеңде сізге 3-5 машина жеткілікті. Көлік сатып алу үшін бастапқы қаражатыңыз болмаса, басқа да жолдарды қарастырсаңыз болады, мысалы жүк көліктерін жалға алыңыз. Шығын материалдарына шиналарды ауыстыру, майды уақтылы ауыстырып отыру, жанармай құю, тұрақты техникалық байқаудан өткізу және сақтандыру кіреді. Осы тұрақты шығындардан басқа, сіз форс-мажорлық жағдаяттарға да дайын болуыңыз керек, мысалы, көлікке шұғыл жөндеу жұмыстары және т.б. қажет болуы мүмкін. 

Қызметкерлерді жұмысқа алу 

Жүк тасымалдауды қалай ұйымдастыруға болады? Кәсіби біліктілігі жоғары мамандарды қызметке алу, оларың саны сіздің бизнесіңізді көлемі мен ауқымына байланысты болады. Жүк тасымалдау саласында бизнесті дамыту үшін қызметкерлердің стандартты құрамы: жүргізушілер, логисттер, бухгалтер. Тапсырыс саны ұлғайып кеткен жағдайда сізге «қосымша күш» керек болады: қауіпсіздік техникасы бойынша инженерлер, механиктер, автослесарлар, заңгерлер, тасымалдаушылар. «1-де 2» стилінде қызметкерлер жалдауыңызға да болады, мысалы, жүргізуші, механик немесе автослесарь ретінде қосымша жұмыс істей алатын маман. Дегенмен, компанияңыздың жұмысы барынша тиімді болсын десеңіз әр маман тек өзіне тиесілі қызметті атқарғаны жөн. 

Клиенттерді іздеу және тарту

Логистикалық бизнесті қалыптастырудың маңызды кезеңдерінің бірі – клиент табу. Алдымен, өзіңіздің нысаналы аудиторияңыз бен ықтимал тапсырыс берушілеріңізді анықтап алуыңыз қажет. Тұрақты клиент бола білетін және тұрақты түрде сізбен серіктестік құра білетін аудиторияға жақсылап талдау жасап алыңыз. Егер сіз көшірумен айналысатын болсаңыз, онда әрине клиенттеріңіз қарапайық халық болады, жарнаманы түрлі тұрғын үй кешендері бойынша чаттарға, қала порталдары беттеріне жариялайсыз. Сондай-ақ клиенттер қатарын заңды тұлғалармен толықтыру мүмкіндігі бар, олар әртүрлі компаниялар, ұйымдар болуы мүмкін, оларды офистерге, бизнес-орталықтарына және т.б. ақпарат тарату арқылы тартуға болады. Қызметтеріңіз туралы сапалы түрде құрастырылған хабарландыруларды OLX хабарландыру қызметі сияқты кәсіби сайттарға орналастыруды ұсынамыз. Міндетті түрде өзіңіздің веб-сайтыңыз немесе әлеуметтік желілерде парақшаларыңыз болуы керек, онда қызметтеріңіз және т. б. туралы ақпаратты үнемі жариялап отырыңыз. 

Қазақстанда газельмен қанша пайда табуға болады? Бұл жиі қойылатын сұрақтардың бірі. Әрине керемет жарнама болғанның өзінде бір газель сатып алып, бірден пайдаға кенелем деуге болмайды. Клиенттерден тапсырыс көп түскен кезде сіз жұмысты игере алмай қаласыз. Статистикалық мәліметтерге қарасақ осы нарық саласы бойынша көш бастап тұрғандардың айлық түсімі 5-6 мың АҚШ долларын құрайды екен. Бұл ретте сатып алынған жаңа автокөліктердің құнын ақтауы 10 айдан бастап 1 жылға дейін, кейде одан да ұзақ екендігін ескеру қажет.

Жүк тасымалдау саласындағы бизнестің пайдалы тұсы туралы айтқанда сіздің нақты қандай бағыт бойынша жұмыс істейтініңізді ескеру керек: жүк тасымалы, көшуге арналған мувинг сервисі, халықаралық тасымалдар және т.б. Нарықтағы осы қызмет түрлерінің өзектілігі мен сұранысына қатысты статистикалық мәліметтерге сүйене отырып мынандай қорытындыға келуге болады, мысалы, OLX-тің 2023 жылғы аналитикалық деректеріне сүйенсек жүк тасымалдау қызметтері «Қызметтер» бөліміндегі Топ-6 санатына кірген. Хабарландырулар саны 90 мыңнан астам, белсенді әрекеттер саны 4 млн.астам, белсенді пайдаланушылар саны 800 мыңнан астам болған.